Starfshættir KN setursins byggja á þverfaglegum kenningum sem tengja saman taugavísindi, sálfræði og kennslufræði. Við fylgjumst náið með alþjóðlegum rannsóknum til að tryggja að sérhver þáttur í skólastarfinu skili hámarksárangri. Við notum ekki óprófaðar nýjungar, heldur nálgun sem byggir á „bestu fáanlegu þekkingu“ (Evidence-Based Practice).
Hér eru meginstoðirnar í okkar kenningarramma og þeir vísindamenn sem við styðjumst við:
1. Læsi og taugavísindi lesturs (Phonics)
Við byggjum lestrarkennsluna á kerfisbundinni hljóðaaðferð þar sem farið er frá hinu einfalda til hins flókna með hjálp LESTU nálgunarinnar.
● Vísindamenn: Stanislas Dehaene, Heikki Lyytinen, Margaret Snowling og Kate
Nation.
○Dehaene útskýrir hvernig heilinn „tengir saman“ sjónræna úrvinnslu bókstafa og
hljóðkerfi málsins.
○ Lyytinen (Finnlandi) er einn helsti sérfræðingur heims í snemmbærri íhlutun og
hvernig hægt er að koma í veg fyrir lestrarerfiðleika með markvissri þjálfun. Hann
leggur mikla áherslu á að barn brjóti lestrarkóðann og þegar því er náð tekur við
þjálfun í að lesa texta og bækur.
○ Snowling leggur áherslu á mikilvægi málþroska og hvernig við grípum snemma
þau börn sem eiga á hættu að lenda í lestrarerfiðleikum.
○ Nation sýnir fram á að góður grunnur í hljóðaaðferðinni (phonics) sé forsenda
þess að barnið nái síðar fullum lesskilningi og ríkum orðaforða.
2. Flæði og áhugahvöt (Flow)
Í Kveikjum neistann er áhersla á að jafnvægi ríki á milli færni nemandans og þeirrar áskorunar sem hann fær. Þegar þetta jafnvægi næst, upplifir barnið „flæði“ þar sem það týnir sér í verkefninu af miklum áhuga.
● Vísindamaður: Mihaly Csikszentmihalyi.
○ Hann sýndi fram á að flæði er lykillinn að dýpri einbeitingu og innri ánægju í
námi. Með því að sníða verkefni að getu hvers og eins (Mastery Learning)
sköpum við aðstæður fyrir þetta flæði í skólastofunni á hverjum degi.
3. Markviss þjálfun (Deliberate Practice)
Við trúum því að leikni náist með endurtekinni og markvissri þjálfun þar sem veitt er nákvæm og hvetjandi endurgjöf.
● Vísindamaður: K. Anders Ericsson.
○ Ericsson sýndi fram á að það er ekki „meðfæddur hæfileiki“ heldur markviss þjálfun (þar sem farið er rétt út fyrir þægindaramman) sem skilar mestum árangri. Þetta er hornsteinninn í okkar þjálfunartímum þar sem aukakennari tryggir góða eftirfylgni.
4. Gróskuhugarfar (Growth Mindset)
Við leggjum mikla áherslu á að vinna með hugarfar nemenda. Þeir eru hvattir til að líta á áskoranir sem tækifæri til náms og þroska, en ekki sem hindranir.
● Vísindamaður: Carol Dweck.
○ Rannsóknir hennar sýna að börn sem trúa því að gáfur og hæfileikar séu eitthvað
sem hægt er að rækta með vinnu (gróskuhugarfar), sýna meiri seiglu og ná betri
árangri en þau sem telja hæfileika vera meðfædda og óbreytanlega.
5. Ástríða og seigla (Passion & Grit)
Ástríðutímar eru einn af lykilþáttum verkefnisins. Þar fá nemendur tækifæri til að vinna út frá eigin áhugasviðum, sem styrkir félagslegan þroska, samskipti og samvinnu.
● Vísindamenn: Angela Duckworth og Hermundur Sigmundsson.
○ Duckworth hefur sýnt að seigla (Grit) spáir betur fyrir um árangur í lífinu en
greindarvísitala.
○ Sigmundsson leggur áherslu á að ástríða sé lykill að árangri. Saman mynda
þessir þættir, ástríða, seigla og gróskuhugarfar grunninn að því að barnið verði
sjálfstæður og drífandi.